ਏਸੀ ਤੋਂ ਲੱਗੀ ਅੱਗ ਨਾਲ ਫੈਲਿਆ ਧੂੰਆ, ਮਾਂ–ਪਿਉ ਤੇ ਧੀ ਦੀ ਜਾਨ ਗਈ

ਫਰੀਦਾਬਾਦ ਦੇ ਗ੍ਰੀਨ ਫੀਲਡ ਇਲਾਕੇ ਵਿੱਚ ਸੋਮਵਾਰ ਤੜਕੇ ਇੱਕ ਭਿਆਨਕ ਹਾਦਸੇ ਨੇ ਪੂਰੇ ਇਲਾਕੇ ਨੂੰ ਹਿਲਾ ਕੇ ਰੱਖ ਦਿੱਤਾ। ਸਵੇਰੇ ਲਗਭਗ 4 ਵਜੇ ਬਹੁ-ਮੰਜ਼ਿਲਾ ਇਮਾਰਤ ਨੰਬਰ 787 ਵਿੱਚ ਅੱਗ ਲੱਗ ਗਈ, ਜਿਸ ਕਾਰਨ ਇੱਕ ਪਰਿਵਾਰ ਦੇ ਤਿੰਨ ਮੈਂਬਰਾਂ ਦੀ ਜਾਨ ਚਲੀ ਗਈ।

ਪਹਿਲੀ ਜਾਣਕਾਰੀ ਮੁਤਾਬਕ, ਇਮਾਰਤ ਦੀ ਪਹਿਲੀ ਮੰਜ਼ਿਲ 'ਤੇ ਇੱਕ ਫਲੈਟ ਵਿੱਚ ਲੱਗੇ ਏਸੀ ਤੋਂ ਅੱਗ ਭੜਕ ਉਠੀ। ਅੱਗ ਨਾਲ ਨਿਕਲੇ ਧੂੰਏ ਨੇ ਦੂਜੀ ਮੰਜ਼ਿਲ 'ਤੇ ਰਹਿੰਦੇ ਪਰਿਵਾਰ ਦੇ ਫਲੈਟ ਨੂੰ ਘੇਰ ਲਿਆ। ਭਾਰੀ ਧੂੰਏ ਕਾਰਨ ਸਾਹ ਘੁੱਟਣ ਨਾਲ ਪਤੀ–ਪਤਨੀ ਅਤੇ ਉਨ੍ਹਾਂ ਦੀ ਧੀ ਦੀ ਮੌਤ ਹੋ ਗਈ|

ਇਸ ਦੁਖਦਾਈ ਹਾਦਸੇ ਵਿੱਚ ਜਾਨ ਗਵਾਉਣ ਵਾਲਿਆਂ ਦੀ ਪਛਾਣ ਸਚਿਨ ਕਪੂਰ, ਉਸਦੀ ਪਤਨੀ ਰਿੰਕੂ ਅਤੇ 14 ਸਾਲ ਦੀ ਧੀ ਸੁਜਾਨ ਵਜੋਂ ਹੋਈ ਹੈ। ਉਨ੍ਹਾਂ ਦਾ ਪੁੱਤਰ ਆਰੀਅਨ ਧੂੰਏ ਤੋਂ ਬਚਣ ਲਈ ਦੂਜੀ ਮੰਜ਼ਿਲ ਤੋਂ ਛਾਲ ਮਾਰ ਗਿਆ ਅਤੇ ਉਸਦੀ ਲੱਤ 'ਤੇ ਸੱਟ ਆਈ ਹੈ। ਉਸਨੂੰ ਇਲਾਜ ਲਈ ਹਸਪਤਾਲ ਭੇਜਿਆ ਗਿਆ ਹੈ।

ਪੁਲਿਸ ਵੱਲੋਂ ਤਿੰਨਾਂ ਦੇ ਸ਼ਰੀਰ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਭੇਜੇ ਗਏ ਹਨ। ਸੂਰਜਕੁੰਡ ਥਾਣਾ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਦੱਸਿਆ ਜਾ ਰਿਹਾ ਹੈ ਕਿ ਸਚਿਨ ਕਪੂਰ ਸ਼ੇਅਰ ਬਾਜ਼ਾਰ ਨਾਲ ਜੁੜਿਆ ਹੋਇਆ ਸੀ ਅਤੇ ਉਸਨੇ ਆਪਣੇ ਘਰ ਵਿੱਚ ਹੀ ਦਫ਼ਤਰ ਬਣਾਇਆ ਹੋਇਆ ਸੀ। ਉਸਦਾ ਪੁੱਤਰ ਵੀ ਕਈ ਵਾਰ ਉਸਦੀ ਕਾਰੋਬਾਰ ਵਿੱਚ ਸਹਾਇਤਾ ਕਰਦਾ ਸੀ। ਪਤਨੀ ਘਰੇਲੂ ਸੀ, ਜਦਕਿ ਧੀ ਅਜੇ ਪੜ੍ਹਾਈ ਕਰ ਰਹੀ ਸੀ।